Segnala Evento
Accedi o registrati per inviare notizie e segnalare eventi alla nostra redazione!
In evidenza:
Accedi o registrati per inviare notizie e segnalare eventi alla nostra redazione!
Su Gazetinu, chenàbura 2 de santugaine de su 2026
Su mese de santugaine comintzat cun unu calendàriu prenu de eventos – Est una prima coa de chida de santugaine prena de eventos sa chi est comintzende in s’Ìsula, cun festas, cultura, isport, mùsica e connoschèntzia de sos logos.
Si comintzat dae sas traditziones cun “Atùngiu in Barbàgia” chi si firmat in Sòrgono, Oroteddi, Meana e Lùvula leende·nche a sas biddas artesania, produtos de su territòriu, sabores e cultura.
In Dèximumannu domìniga finit sa festa de Santa Arega cun “Su Roseri”, sa protzessione de Santa Arega e cussa de Nostra Segnora de su Rosàriu.
In contu de isport, atentu mannu in sa Costera de su Coraddu pro su Rally Itàlia Sardigna 2026, programmadu finas a domìniga cun sede in S’Alighera. Sa firmada sarda de su FIA World Rally Championship est su penùltimu apuntamentu de s’istajone e s’ùrtimu in Europa, e sos protagonistas de su Mundiale ant a èssere impignados in terrinos isfossados in mesu de su prùere e de panoramas ispantosos.
In Assèmini, dae oe finas a domìniga campu lìberu a sa cultura cun sa de tres editziones de su Festival Lethèrario. In s’auditòrium e in biblioteca comunale b’at a àere atopos dedicados a libros, arte, teatru, atualidade, giornalismu e impignu tzivile, cun sa dirigidura artìstica de Giovanni Follesa.
In Sìnnia custu sero pro “Incontri di montagna” b’est Marco Buonomo e su biàgiu suo in bitzicleta peri 33 Paisos, chi est duradu tres annos e tres meses.
Domìniga torrat finas “Domenicalmuseo”, cun intrada gratùita in museos e parcos archeològicos istatales bidu chi est sa prima domìniga de su mese.
Finas in zona de Aristanis b’at eventos meda, dae “Ichnos” e “Zenias de Atonzu” in Sèdilo a “Colori e Radici” in Tzeddiani.
In Aristanis su Trio Sheliak est protagonista de “Domenica in concerto” e in Nurachi sighit “Nuracque”. Sas escursiones in Monte Arci e in Marmidda cumpletant su programma dedicadu a connòschere su territòriu a manera lenta. In Terraba, in ùrtimu, domìniga sero finint sas festas pro Santa Vitàlia cun su cuntzertu de eroCaddeo.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
